Acts 28

1Esa fyewyi ya kpe ge muse n ya wankma kpe nyi, a yi kwo ge Malita nu. 2Aza nɓa ɓei fi ɓo nyi ɓa wu yi yeye, ɓa ku ena fin yi ya wye ntu ogma ɓo nkwo ɓo lu yi, ese yi fu yi nyi.

3Ngye shi Bulus ɓo ku ashinwan wa ya kpe nna, gbezhi kwa kun ntu gugurgu ɓo, kwa knanyi Bulus nbwa. 4Shi a Malitayi ɓei gye kwo shegyi n Bulus bwa, ɓa gna aje ge, “Ozaye zhin zawuyi nu ɓehinhin! Wo la pwo n nuwan, ama ɓenukwoyi kwo nu ta ye ge wo pwo m.”

5Ama Bulus wa mi kwo ya fi n na, wa ce wo nya gni ntna ɓoho. 6Aza yi bwa zhi ɓai gye ge, esa fyewyi wo ɓa ya sun, wa miyashi wa fi, amma shi ɓa ɓo gye esa la mwa to ɓoho kwoi zhin wo m, ɓa ɓeda shando ɓa gna ge, wo zhin shekwoyi ho nu.

7Vivi aba yi n yi ɓo wankma nyi, oza ho ɓei nyi ɓo a yi ge Bubliyus, wo nu ɓo zhin gwamna muse yi nya. Wa gwo yi n bugba bui-bui yi, wa ga yi nyagyi har anyipyei ngun-ata. 8Bubliyus dada wo ɓo n nyasan yi, nayi nagun ɓedo n goro-san yi. Bulus wa lo wa zhin aduwa, wa to wo bwa wa wo kagna. 9Azaje vinya, nɓa to ɓei n lafiya yi m n muse yi, ɓa ɓe a ɓa kagna. 10Ntu deye ɓo aza ɓa ɓe yi n kyauta yi n mwa, esa nu yi ɓo ye ya kuka, aza ɓa ɓe yi na nya yi gbo-gbo n yi ɓa zhin akma n cei n zokwo. 11Apya ɓo ku sun ngun-ata, ngye shi eya ɓei ɓaya, ya kuka njesun, nsa deye yi ɓo zan-zan n eya Alekzandariya nya yi nkwo zhin vinyikwo shi n muse hi, ai yi kwo ge “Aza aba.” 12Eyi akpezhiba kmisunyi sai Sirakusa, ya bwa anyipyei ɓo ngun-ata. 13Ya kuka ɓo ya pmi lo Rigiyum, ya bwa nyipyei gmanyi ese kudu nya kwa ya ci, nyipyei bahi yisi Butiyoli, 14Nɓo ya sun a Yesu viyi hoi, ɓa gyi yi wye ge yi ku fi nɓa yi har anyipyei tnaba. Ya kpe kala ku ya lo Roma.

15Eyi azaje nɓa ɓei fi n Roma nyi, ɓa ku wo ge yi ɓe lo, ɓa ɓe shegun yi n Abiyu gnikwo. Azado ɓa shegun yi n Ashiragyi ngun-ata. Shi Bulus ɓo gye ɓa, wa zhin Shekwoyi godiya, wa bwa bugba kala.

16Shi yi ɓo si Roma, a ye Bulus ge wo dna wo nya abaho-baho n wo ɓa dna, sai dai soja ɓei zhin woi gu wo. 17Shi wo ɓo si wa bwa anyipyei ngun ata, wa yi a Yahudiyi atukwoda wa da ɓo nɓai wa gna, “Omi azaje, a Yahudiyi nɓa fi n Urushelima nyi, ɓa na wan mi ɓai dna mi a Romayi akun, ko shi ko nyi mi to zhin nyaho-nyaho yi m, ko ma zhi za wuya kwo ɓo n kwo zhin kunnu eyi azakwoyi nya m.

18“A Romayi ɓa ku owa da mi, ɓai ye ɓa ya mi, ntu ge ɓa to sun nyaho n mi aba nkwo kunce lo nfi yi, ngye shi a Yahudiyi atukwoda ɓei gna ge awu mi nyi m. 19Shi a Yahudiyi atukwoda to ɓo ye a shaula yi m, to a wun aje bugba m, ma gye ko la mi ze tile ma gyi abye n ɓeda yi kwa lo Kaisar aba. 20Ma yi fye ge fye ɓe n naiye ge ya kpe ajeye, magna fye ge, mi dna n agma ye ge, mi n gaiciya ga yi lo ge Masihu wa ɓe nu.”

21ʼBa ye ɓa gna wo ge, “Yi to wo ɓoho tu nho tukwo m! Yi to bwa wasika n Yahudiya, ko naza nɓa kun lo n Urushelima, ɓai ɓe iya nyi m. 22Ama yi ce pma ya wo enya ho gaiciya yi ga, enya dei n yi kpe lo, okwo nu ge abaho-bahoi vinya, aza ta ye a Yesu viyi lo m.”

23Ɓa esa shi, nwyihi aza nmwa begye ɓa yezhi n wo puwa. Wa daɓo n ɓai tu Shekwoyi ebemi ɓo, woi wu ɓa aɓo ntu Yesu ɓo ngye shi aka fi n Littafi Gyi-gyi-yi, wa ya ɓa wu n attaura Musa nya ɓedo anabi yi, Wa ya ɓa wu n labmi yi har wyeshe!

24Azaho ɓa ku gaiciya ga, ama azaho to ɓa gaiciya m. 25Ɓa na Bo aje yi n mwa, ɓa kuka n ɓeda gmanyi shi n Bulus ɓo da ge, “Zafun Gyi-gyiyi ɓo ku ɓeda da cewo n anabi Ishaya gbe ge,

26“Wa gna a Yahudiyi ge, ‘Fye ɓa wo fyei gye ama fye ta bwa awyega m, 27ntu ge ofye abugba shin-shin lo, ofye atnubua ta ye lo ɓa wo m, fyei ku fye awye kpe to fya bwa awye gam, ntu ge fye ta ye lo fya gye, fya wo, fya bwa awye ga, fya ɓe ma ka fye gna m.’ 28– 29Mi ye fya kpe ge, gni-gni Shekwoyi nya ye, kwo nyi ntu abyedo ɓo nu ce, ɓai ɓa gwo kwo.”

30Bulus wa wo nya dna n wohin haya nyakun har aye ngun aba, woi gwo azhiɓeyi doho-doho nɓa ɓei ɓe wo wyegye. 31Woi gna ɓa Shekwoyi ebe mi ɓo, n Dagayi Yesu Kristi yi, zaho-zaho yi to ɓo wo wo ɓi m.